武漢肺炎疫情令所有學校停課至三月，間接令不少中六同學已開始study leave。因此，我會在此公開我中六時的study leave timetable，讓各位可作參考。先等大家睇下時間表，之後會再作解釋：

4:00am-4:15am 起床及梳洗

4:30am-6:00am 跑山(或其他帶氧運動)

6:00am-7:00am 沖涼及早餐

7:00am-8:00am 溫習主科

8:00am-10:00am 操卷主科

10:00am-10:30am 休息

10:30am-12:30pm 操卷主科

12:30pm-1:30pm 食飯

1:30pm-4:30pm 溫習electives

4:30pm-6:00pm 操卷 electives

6:00pm-6:30pm 休息

6:30pm-7:30pm 晚飯及洗澡

7:30pm-10:00pm 溫習主科及重溫當天各卷表現

10:30pm 瞓覺

首先第一樣野，點解咁早起身？因為其實去到study leave，能夠早過9:00am起身嘅人真係好少，所以如果你起身可以起得早，已經戰勝左大部份嘅人。

咁可能你覺得，我可以遲啲起身但係遲啲瞓覺嘅啫，一樣差唔多時間。冇錯，遲兩個鐘起身遲返兩個鐘頭瞓睇落好似係一樣咁樣。但係如果你你攞返你張準考證出嚟睇吓，你每一科係幾點開考。你就知道每科都係8:30開考，即係代表你要令嗰個時間最有狀態。所以，我嗰陣專登4:00起身，運動到6:00，沖完涼食埋個早餐先至開始溫習，再去到8:00開始操卷，就係為咗嗰個時間有最佳狀態。去到考每一科嘅時候，我都係4:00起身。

每一學科的溫習時間比例，其實是絕對個人化的。因為每個人都有自己嘅preference，同埋你哋大學想入嗰科都有各自嘅要求，如果你想入果一科重視某些學科嘅，就應該投放更多時間在該學科。於我而言，主科比較重要，因此我投放比較多時間。

另外，操卷後需要立即對卷。當天所完成的幾份試卷，當晚睡覺前重溫一次，最緊要知道自己弱點及犯錯地方，針對改善。最後關頭，必要了解自己的犯錯。自己操卷嘅時候犯錯幾咁離譜都唔緊要，出到去唔好再犯就已經贏了。

最後，希望大家絕對不要忽略運動的重要性。我刻意安排運動時間在凌晨時分，為的是令自己能夠以精神飽滿的狀態展開每一天。之前我都講過，如果你冇做開運動，去到呢段時間有冇做運動，身體一定頂唔順。同埋做完運動，溫書一定會精神好多。

公開試最重要的就是堅毅意志。

順帶一提，病毒已經開始社區爆發，溫習盡量留係屋企，唔好去公眾地方。

可能有時候你會覺得，今次唔得咪下一次囉，反正又唔係得一次機會。比賽今場輸左咪下場再打過，DSE衰左又可以再考一次，唔得考到得。

呢種諗法雖然樂觀正面，但就係令你每一次都唔會盡全力去做到最好，因為你覺得有second chance，為自己留下退路，覺得永遠都有第二次機會。

條條大路通羅馬？

入唔到大學，可以retake，或者asso升去degree，又或者都總有其他路。但其實就係你以為你有好多後路，然後俾藉口自己唔盡力，最後可能高不成低不就。

冇錯，人生有唔同嘅機會，呢樣唔得咪試下另一樣囉。但真正嘅機會唔係成日有，當你遇到機會，就必定要把握。

希望大家珍惜機會，當每一次都係最後一次，全力以赴。

可能大家係人生不同階段都試過為自己定立不同的目標，但是你會發覺可能總是未能完成目標，或者去到一半已放棄，但你又不知道出錯的地方是什麼。

我們定立目標時，其實並不需要考慮太多關於可行性的問題。例如可能你覺得自己英文唔係太好，但你仍然可以定立英文攞5**為你的目標。

咁係唔係自欺欺人呢？會唔會被人笑呢？我有冇能力呢？

你定立每一個目標嘅時候，個目標都必須係你心中好想達到一個目標，係你一個好大嘅願望，你會盡全力達到該目標。

目標嘅距離太遠？

其實，只要你將一個大目標分成好多個小目標，逐個逐個去完成，不斷一小步一小步走，唔可以心急，最後就會走到去你嘅目的地。

學習英文，如果想進步，就必須要為自己定立一個大目標，可以係考5**，或者可以係全級頭五名，然後分成好多個小目標，例如每日一定要睇英文報紙、至少要睇10分鐘嘅英文影片、每星期有一日只可以講英文、每星期做兩篇閱讀理解、每星期寫一篇文。

如是者，你最後一定可以達成自己嘅目標。但請你緊記，沒有付出，就千萬不要希望獲得任何回報，世上沒有不勞而獲之事。

各位加油。

我曾經都同你地一樣，準備考DSE嘅時候遇上好多唔同嘅情緒，有時好有衝勁、有時好沮喪、有時好緊張。

你唔知道自己將來嘅路究竟係點，所以你冇辦法冷靜，你會想好心急，你想快啲見到效果。但當你努力，又感覺唔到有太大進境。

其實公開試係一場馬拉松，需要你默默耕，並唔係一場短跑。你需要一套策略，冷靜地去實行，千萬唔可以焦急。

去到呢個即食時代，好多人會要求即時見效。但其實你嘅努力係唔會即時見到效果，唔會即時係分數反映出嚟，你要花時間扎根，最後先可以盛放。

Trust the process.

一直要相信。