好多同學都知道我上堂嘅時候好鍾意引用股票投資舉例子，(有同學曾經同我講話跟住我之前提及過嘅某啲股票去買嘅話，可以賺返所有學費同埋零用錢，亦有同學曾經建議我不如去教埋投資)。不過我暫時淨係教英文啫，今日呢個post一於講吓英文科唔同分卷嘅時間投資價值，即係每份卷應該投資幾多時間。尤其係好多升中六嘅同學成日都問我，究竟應該點樣分配時間針對唔同嘅分卷。

Paper 1 Comprehension (20%):

客觀上嘅分數佔比的確唔算太吸引，只有20%，考得好嘅可能有17-18分，合格高少少就有12-13分，就算狂操呢份卷，最後可能只係overall多3-4分，所以我理解同學將呢份卷嘅重要性排得比較後。事實上，閱讀理解係最容易自己進行操練嘅一份卷。你可以細心諗下，Paper 2寫完篇文之後要搵老師改，又要等一段時間先有結果同評語；Paper 3又要播光碟，然後寫個篇Integrated tasks自己淨係可以對係咪搵齊晒points，其他嘢都係老師先可以比到實質評語；Paper 4更加係要約齊同學同老師先可以一齊練。反觀Paper 1，自己就咁計時90分鐘就可以開始做，然後答案其實大多客觀，可以做完自己即刻改。跟過我學點樣做Paper 1嘅同學就知道，每次幫自己對卷嘅時候細心研究自己點解會錯、多數錯喺邊度，記錄低晒，基本上Comprehension好快已經漸入佳境。但總括而言，Paper 1佔分的確比其他卷低，雖然仍有時間投資價值，但就不算太高，中六同學不值得投放大量時間於此卷，我建議每星期完成1-2 set comprehension (Part A + B)已經足夠。

Paper 2 Writing (25%)

寫作呢份卷其實係某些同學投資好多時間嘅一份卷。我並唔會話呢個做法係不正確，但我會覺得如果投放太多時間係呢份卷可能唔太值得，所以同學應該考慮清楚。令我更加擔心嘅情況其實係好多同學以為自己chur緊呢份卷嘅時候，其實根本冇進步過。因為近幾年我發覺好多同學，尤其係上到中六嘅時候會成日背一啲句子、段落、推論、靚字、文章，然後喺考試嘅時候key落去。首先我強調學習一啲靚嘅vocab唔係冇用，但係我留意到就係好多同學會強行用呢啲字，用得不適當，其實最後帶來反效果，完全損失時間成本。我學習英文咁多年，深知道要改善寫作能力永遠不可能是一朝一夕的事，唯有踏實從根基開始推進，先至可以慢慢見到進步，並不是其他人所說的「背下句子就考好啊」。好多同學背左一啲段落同埋句子然後夾硬喺考試嘅時候貼上去，係極危險嘅動作，因為只要題目改變左少少，你所背嘅嘢都已經完全唔識用，好多同學曾經因為呢種動作而導致自己離題，是公開考試中最嚴重的犯錯。如果你真係已經升到中六，你要以平常心面對呢份卷，我建議一星期寫至少一篇文，間中開個SCMP睇吓文章，因為考評局係想你用journalist style去寫文章，但Paper 2我不建議你投資最多時間，因為客觀地衡量是不值得。

Paper 3 Listening & Integrated skills (30%)

眾所周知，佔分最重嘅一份卷就係Paper3。但係其實點解啲一份卷會佔最重分呢？你只要細心諗下，就會發覺其實呢一份卷係考晒你聽、說、讀、寫嘅能力，所以點解要做聆聽及綜合能力，就係因為佢真係測試到你嘅綜合能力嘅，所以亦都係點解佢係最重要嘅一份卷。但係講真果句，跟過我學點樣處理Paper 3嘅同學都應該知道呢份卷要喺好多地方執分極其容易，多加練習可以穩陣地攞到lvl5或更高嘅成績。各位中六同學，呢份卷嘅投資價值係最高，亦都係中六同學想升grade嘅關鍵分卷，建議你有時間就練習，係重點操練嘅一份卷。

Paper 4 Speaking (10%+15%SBA)

跟開我嘅同學都知道我經常強調呢分卷嘅重要性，至於點解Paper 4能夠影響你英文科25%嘅成績就唔再喺度解釋，因為較早前已經解釋咗幾次。除咗呢份卷本身比重高之外，亦係極少數可以短時間內極速升grade嘅一份卷，因為其實考呢份卷唔需要你本身英文好好或者講英文講得好流利，只要你演技夠好，同埋做足晒人哋想見到嘅嘢(eye contact, interaction, politeness, smile, etc.)，基本上要攞lvl5都係一定冇問題，只要你交足戲，跟住晒我教你做嘅每一樣，好好做齊晒，呢份卷係可以幫你拉高英文科嘅總分，就算唔係拉高，都至少唔係成為你係英文科嘅拖累。各位中六同學，呢一份卷嘅投資價值僅次於卷三，投資價值高。建議每星期至少參與一次oral practice，就算冇機會練都要對住塊鏡講英文，唔順講到順，講到好自然，隨時準備好用英文對答，爭取機會講英文。

我們去學習一種語言，無論是中文或者英文，總是難以觀察自己的進度，因為在語言上的進步難以用一些簡單的數字或者分數去完整地反映。所以，這種情況導致很多人感覺不到自己進步，繼而感到氣餒。

其實，學習語言是一條漫長的路，永遠沒有捷徑。你需要不斷學習、不斷嘗試，才可以一直前進。的確，有時候即使下苦功後，也未感到自己有任何進步或改善。這情況其實就像你小時候開始長高，你每天都看着自己，從來都不覺自己身高改變了，因為其實短時間內的改變總不會太大，難以察覺。但遇上一些很久不見的人，他們卻會覺得你高了很多。

學習英文如是，只要你一直都有付出，你就會一直進步。你沒有即時察覺，但愕然回首之際，卻發覺自己已經走到很遠。

學會堅持，然後耐心等待收成。

“It does not matter how slow you go, so long as you don’t stop.”

好多同學對英文科卷四說話其實有好多誤解，其中一個最大嘅誤解就係以為呢分卷淨係佔10%。

咁呢份卷應該佔幾多分呢？

其實係25%，即係佔分重過卷一，同卷二一樣係咁重要。對於你喺DSE英文入面嘅總成績其實係有好大嘅影響，考得好可以幫你提升兩個grade，即係由5變5**。當然，水能載舟亦能覆舟，你考得差嘅話同樣係可以拉低你兩個grade。

但係點解係25%？

因為其實卷四係直接影響緊你SBA嘅成績，即係講緊你卷四考得好嘅話，其實係會拉高你SBA嗰分。但如果你卷四考得差，就算你嘅英文老師係SBA俾咗滿分你，都一樣係會拉到好低。所以其實好多人一直都建議取消SBA。

所以，準備考DSE嘅你千祈唔好忽略卷四。

如果其他人問你”are you feeling under the weather?”

其實並非問你天氣怎麼，而是問你身體是否不適，”under the weather”的意思就是”sick”。

所以，當別人説自己感到”under the weather”的時候，就跟他說一句”wish you a speedy recovery!”，祝他早日康復。